हाटी चाला हाटो के

1) पीठी दा बोजा हाथो दी लाठी, जोब चाला हाटो के हाटी-2
सीजा खाणा, सीजा बाणा, सीजी ओसा महारी थाती माटी-2
माश- लोविये-कोदा रो कावणी, सी पोड़ो थी चुड़पुरी पोचाणी-2
ठाये-ठाये थीये पड़ाव माहरे चाली पोडो थे रात्त ब्याणी-2

बेटूये काछी कोमरो गाची, पाणी चामड़े री थी लाता के -2
हाटी चाला हाटो के, मेशने रूटी की बाटो के -2
शाऊणू, भोजू, मुंगलू, वीसू सोबे थिए साथो के -2

2) पीठी पसीना लातो छाऊ, बताऊ, तो बताऊ कोसी गे बताऊ-2
ऐसी हाले सोबे चाले, कुड़बा आपणा ऐशे के पाऊ -2
कुठा पीशा घोरे पायओ, सोदा आणा नोगरा जायेओ -2
खेचो री आपणी विकयो जोणीस, गुड़ शाकर आणी पीठी कछाआयो-2

सातू सीती निगडी छा, हेरो शाकर की भातो के -2
हाटी चाला हाटो के, मेशने रूटी की बाटो के -2
शाऊणू, भोजू, मुंगलू, वीसू सोबे थिए साथो के -2

3) घीओ रा टीन पीठी चोकओ, मिलो था आना तेथी बिकओ-2
कोठ खामओ पुजो थे शिमले, आणा था कापड़ा बोरी दा जीकिओ-2
याणे-सयाणे रा -ब थीया फीकोर, बांदे- टाटे ब थिए कुडबे भीतर -2
भोईते देसो दे गिरीयों थे पाछु, शाओ पूछो थे सोब ईठ मितर-2

कोले - झाजरी शोटणा तबारखू, खोलचे खुमली पाओ बातो के-2
हाटी चाला हाटो के, मेशने रूटी की बाटो के -2
शाऊणू, भोजू, मुंगलू, वीसू सोबे थिए साथो के -2

4) भोड़ू चामडू मांजो भोसमें कुशणे, शिको के पोडो ठोगडे पुछणे-2
ऊनो री कुटडे छोईये घोणी, चिते आओ तेरे आशु टूशणे-2
खीतो रा रुपिया जाजड़ा आणो, धौणऊ-शोरी हामे ठोडे के ताणो-2
शाटी-पाशी री ओ ली खुन्दो, सोजो नाते दो पोड़ो छवाणो-2

निखणे होये सोबै जाये, चेई आपणे-आपणे ठाटो के-2
हाटी चाला हाटो के, मेशने रूटी की बाटो के -2
शाऊणू, भोजू, मुंगलू, वीसू सोबे थिए साथो के -2

लेखक: नरेन्द्र चौहान (9816025832)